Shetlandponys, Pottok's und Friesenpferde vom Dörfli

22. April 2008 Beitrag vom Mami:

Ab heute berichten Jenny und Rocky von Ihren Erlebnissen rund um die BEA Pferd 2008.

Die Vorbereitungen laufen in vollen Zügen: Nun ist auch klar, wer wann wie (warum) mitkommt - aber das ändert sich erfahrungsgemäss auch noch bis zur letzten Minute...

Zäumli, Sättel und Geschirre sind geputzt und gefettet, Wägeli geputzt, Schabracken gewaschen, Tenue's schon (fast) parat - es kann sich keiner vorstellen wie viel da mit muss! Ich wundere mich jedes Mal, dass wir überhaupt noch was zu Hause haben, denn es scheint, dass im Laufe der 10 BEA - Tage alles an Material und Ponyequipement nach Bern wandert. Wenn wir dann Morgen Nachmittag den Hänger und das Auto "packen" - ich ahne Schlimmes - Jenny und Rocky werden wohl mindestens ein Drittel an Platz benötigen (und immerhin gehen ja 5 Ponys mit !!) - denn Rocky hat, ich wage das zu behaupten, die wohl "umfassendste" Ponyaussteuer in ganz Westeuropa. Da ist die mit Strass-Steinchen besetzte weinrote Schabracke nur das Mindeste, das unbedingt mit muss. Vitamerfen und Bepanten sind auch im Gepäck, denn Rocky, Nick und Max haben wieder Mal "geblödelt" und Rocky hat eine leicht lädierte Nüster, die unser guter Freund und Mann für alle Fälle-Tierarzt Ernst professionnell mit 3 Bostich-Klammern vor einer Woche flicken musste. Nun sind Rocky und Jenny seelenverwandt, da ist sich Jenny sicher, schliesslich musste vor einem Jahr auch Jenny ein Loch im Kopf bostichen.

... BEA - wir kommen!

23. April 2008

Hüt hei mer no eingisch für d'Bea güebt, d.h. s' Raphi, Michelle, Carmen, ig und Debbie. Es het gschiffet und mer si mega nass worde - ou d'Pony si pflüdi-nass worde. Nächhär hei mer gmischtet und s'Mami het afo packe und het aues zur Sattu-Chammere use grupft. Hie gseht der üses Puff.
Mer heis luschtig gha, fröie mi uf morn, wöu morn düe mer istalle. Dr Rocky und ig si sehr ufgregt. Grad nach dr Schuel fahre mer uf Bärn.

Bis morn! Jenny und Rocky


24. April 2008

Ändlech isch d'Schue us, wöu, hüt gö mer jo go d'Pony istalle und dr Stand ufboue. Dr Rocky isch ou es bitzeli ufgregt gsi, im Hänger isch är immer gstige. Im NPZ (Nationales Pferd Zentrum) hei mer z'ersch üses Stauzäut und d'Boxe gsuecht, wieder einisch z'hingerst hinge! Dr Rocky, Nick und d'Ella hei mer de dört igstallet, mit em Fox si mer i d'BEA übere gloffe. Irgendwie isch aues angers aus schüsch, e riese Bousteu und mega wit ewäg isch's Zäut 684. Und Material schleppe, schleppe, schleppe... ändlech si mer do - s'Zäut isch e chli dunku, aber mer gwöhne üs de scho dra. Dr Fox isch zwüsche zwe Stuete mit Fülli, es isch em eigentlich glich... Mer hei scho d'Thea vo de Esle, d'Huguette mit de Paso Finos, d'Nadia und ou d' Anita vom Scheyehouz troffe - eichach viu wo mer scho lang kenne!

Dr Rocky im NPZ isch immer no am hüppere und scharret wie blöd i dr Box und het natürlech scho sis Wasser umgschosse. S Bepanthen für sini Nase isch ou nine! Dr Papi ladt no dr Hänger us und de gö mer no öppis go ässe i dr Curling Haue. Bis morn - Jenny und Rocky

25. April 2008
Hüt dr glich Stress wie geschter - hei vor Schuel - ha zum Glück am Nomi chönne frei näh - ab uf e Bus und mit em Zug uf Bärn. S'Trämli hei mer zersch i die fauschi Richtig gnoh, aber jetzt wüsse mer wo düre, het s'Mami gseit. Z'ersch a Stand, dr Foxli, d'Manu und dr Cyril abghout und übere i ds NPZ. Dr Fox het schön blöd to bis übere, d'Esle hei ne am schönschte dünkt. Dr Rocky het scho gwartet, zum Glück isch är nid fescht dräckig gsi, s'Mami im Stress mit aspanne mit em Nick und d'Manu het d'Ella gritte. Mer hei sogar s'Material hüt am richtige Ort gha, letscht Johr heit das irgendwie nie gstumme. Für e Rocky isch das hüt aues s'erscht mou gsi, i ha jo scho gwüsst wie dr Has louft. Zersch übere Fuessgänger streife, über d'Autobahn, näbe dere mega Bousteu und no dür die Lüüt düre, das het am Rocky nid immer gfaue, ha ne ziemli müesse hebe. Im Abritt-Zäut isch är scho chli ufgregt gsi, d'Schwarzwäuder vom Egger si scho dinne gsi. Ändlech si mer drann gsi - s'Vreni am Mikro het grad verzeut, wie guet mer zwöi das mache, und scho macht er e Bocksprung und dunge bini gsi - e super Blamasch - ha mer nid weh gmacht, bi eifach i d Mitti und wieder ufgstige, dört isch är eifach megalieb blibe stoh und het kei Wank gmacht. Aui si cho z gumpe und hei gfrogt wie's mer got??? - Het mi mega gnärvt - im Fau. Bis is NPZ übere het dr Rocky nume no gloub me seit piaffiert oder so. Är isch gloub froh gsi, si mer wieder däne gsi. Nächhär hei mer no dr Fox mit em "Bloser" auf Hochglanz poliert und si is Roundpen übere. Läck isch die Ziit schnäu ume! Am sächsi hei mer no dr nöchscht Tag besproche und si dem mit em Vreni heigfahre. S'Föteli het dr Cyril gmacht und s'Mami het gseit, mer duege de das morn oder so dri. Auso - bis morn - Jenny und Rocky PS s'Bepanthen hei mer wieder gfunge, zum Glück!

26. April 2008

Hüt isch eigentlech aues ganz normau gloffe, usser, dass dr Rocky es Hufise verlore het, wöu är zwüsche zwe so blöde Platte, wo mer mit de Ross müesse druuffe loufe, sech verhänkt het und grad s'Ise abgrisse het. Zum Glück isch das grad vor em Präsentationsring gsi, wo ou grad dr Hufschmid si Stand het. Nid e mou zwe Minute isch es gange, und's Ise isch scho wieder druf gsi. Dr Uftritt isch aber guet gloffe. Ah jo, das ha ni vergässe, s'Michelle isch ou no derbi gsi und het dr Nick gritte - s'Mami het dr fausch Sattugurt derbi gha und de het dr Papi no 5 Minuten vor em Uftritt müesse e nöie Sattugurt go choufe, es het jo gnue Ständ dört. Wie gseit, dr Uftritt isch guet gloffe, hüt bi ni ned abegheit, mer hei sogar zwöi mou inne dörfe, wöu d'Ziit no nid isch düre gsi. Dr Rocky isch nüme me so närvös gsi wie geschter und i ha Fröid gha. S'Podescht müesse mer no chli üebe, dört het är hüt nid druf wöue. S'Wätter isch so schön gsi, do hei mer no Softice gässe und si bi de Kline Tier no im Zäut gsi - die hei so ne Art Voliere, wo me inne cha und d'Vögeli um eim umeflüge - das isch würkli schön! Auso - de bis Morn! Jenny und Rocky


27. April 2008

Hüt hei mer würkli e mega Stress gha! Wöu dr Fox geschter het mit hei müesse, d'Lucia isch drum rössig, hei mer hüt am morge mega früeh am 7.00 z'Morge gässe und si scho vor de nüne z'Bärn gsi. S'Debbie het zit neuschtem es Flair für Esle und darf mit de Eselfründe ou no d'Uftritte mit dr Sofia mache, e andalusische Esu wo im Ballebärg deheime isch - gseht mega luschtig us, aber es funktioniert würkli guet! Si het auso am zähni und am Mittag e Uftritt gha. Usserdäm si hüt no d'Oree und dr Max no mitcho. D'Oree chunnt de am Zischtig i d Ustellig und muess sech no chli a Trubu gwöhne und dr Max bruche mer de morn no für d'TTEAM - Vorstellig. Mir hei auso mega viu zum putze gha und hei scho am 11i agfange. Im NPZ si Mounted Pony Games gsi, es Chaos pur, luter Franzose mit i gloube 100 Pony oder so - Pony Games si so ne Art Staffette uf de Ross. Am haubi zwöi hei mer für e ZKV e Gymkhana-Demo dörfe mitmache, dr Rocky und ig als Stufe 0 Füerzügelklass. Isch scho guet gsi so, wöu s'Mami no het mitdörfe, das het dr Rocky beruhigt, är het sogar dr Flattervorhang unds Brätt wie nüt gmacht. Scho am zwöi hei mer im Roundpen müesse si... dört hei mer Uftritt gha, ig unds Debbie hei mit dr Oree (die isch erstunlich ruhig gsi) dr Ella und em Rocky dört gwartet, i dr zwüschezitt si dr Papi unds Mami mit em Nick retour is NPZ und hei ne vor's Wägeli gspannet. Bis si wieder cho si, hei mer no es zwöits mou inechönne is Roundpen, wöu ebe d'Zit nid umegsi isch.
Nächhär hei mer is Zäut 682 müesse für die nöchscht Uffüehrig. Hier hei mer mega lang müesse warte. Eigentlich macht me a dr BEA nüt angersch aus umelatsche, Ponyputze und warte uf irgend öppis. Ersch am haubi füfi si mer mit auem fertig gsi - ändlech aues versorget, Pony verpflegt und jetzt hei mer öppis z'ässe und z'trinke chönne näh - puuh!! Bis morn! Jenny und Rocky